बारामा खुल्यो सुविधायुक्त अस्पताल

medianewskhabar //बारा — ९० वर्षीय बुबा रामाज्ञा साह कानुलाई तीन दिन उपचार गराएर जयनारायण मंगलबार घर फर्किने तरखरमा अस्पताल परिसरमै भेटिए । सातादेखि ज्वरो र खोकीले बिरामी भएका वृद्ध रामाज्ञालाई उनका छोरा जयनारायणले तीन दिन अघि सिम्रौनगढ बजारमा सञ्चालनमा आएको नगरस्तरीय अस्पतालमा भर्ना गराएका थिए ।

उनी वीरगन्ज गएनन् । नगरले बनाएकै अस्पतालमा उपचार गराएर खुसीसाथ घर फर्किंदै थिए ।

‘अस्पताल सिम्रौनगढवासीका लागि वरदान भएको छ,’ सिम्रौनगढ–२ मौवाहीका जयनारायणले भने, ‘वीरगन्ज जाँदाआउँदा एम्बुलेन्स भाडा ४ हजार लाग्थ्यो । २० हजार अरू थप अनुमानित खर्च लाग्ने थियो । तर त्यसको एक चौथाइ खर्चमै उपचार गराएर घर फर्किदैँ छौं ।’ पैसा र समयको बचतसँगै बाहिर हुने थप झन्टबाट जोगिएको उनले कान्तिपुरलाई बताए ।

सिम्रौनगढ नजिकैका आदर्शकोतवाल गाउँपालिका–५ टेढाकट्टी रुपौलियाका ८० वर्षीय बादर भगत मालीलाई उनका छोरा भिखारीले त्यही अस्पतालमा दुई दिन भर्ना गरेर उपचार गराए ।

‘अस्पतालमा खानादेखि समान्य खर्चले बुबालाई उपचार गराउन पाउँदा हामीजस्तो ग्रामीण भेगका बासिन्दालाई राहत भएको छ,’ भिखारीले भने, ‘भारत र वीरगन्जको विकल्पमा यही उपचार पाएका छौं ।’ अस्पताल सञ्चालनमा आएको १० दिनयता रामाज्ञा र बादरजस्तै अस्पतालमा १२ जना महिला/पुरुष बिरामी भर्ना भएको भेटिए । अरूले धेरैले उपचार गराएर फर्केका छन् । अस्पतालका सह–इन्चार्ज राजेन्द्र साहका अनुसार १५ बेडको अस्पताल सञ्चालनमा आएकोदेखि १२ सय बिरामीले उचार गराएका छन् । दैनिक सय जनाको हाराहारीमा अस्पतालमा उपचार गराइरहेका छन् । ‘अस्पताल सञ्चालनमा आएको १० दिनमै बिरामीले भरिभराउ छ,’ उनले भने, ‘बिरामीको चाप थेग्न नसक्नु भएको छ ।’

दुई करोड खर्चेर २ तल्लाको १२ कोठे नगरस्तरीय अस्पताल सिम्रौनगढ नगरपालिकाले आफ्नै लगानीमा निर्माण गरेको छ । कोभिडको महामारीले सिम्रौनगढवासीलाई अस्पताल जुराइदिएको नगरप्रमुख विजयशंकर यादवले बताए । ‘४ वर्षमा करोडौंको नाला, सडक, पुल, विद्यालय भवन बनाएर जति सन्तुष्ट भएँ त्योभन्दा बढी सन्तुष्ट मानवीय उपचारका लागि अस्पताल बनाएर भएँ,’ नगरप्रमुख यादवले भने, ‘महामारीले मानवीय स्वास्थ्य जीवनको महत्व बुझाइदिएपछि एक वर्षभित्रै अस्पताल बनाएँ ।’

नगरभित्रका अन्य सरकारी स्वास्थ्य चौकी र प्राथमिक स्वास्थ्य केन्द्रबाहेक एमबीबीएससहित प्राविधिक र स्वास्थ्यकर्मी गरी २२ जना परिचालन गरेर सुविधायुक्त यो अस्पताल सञ्चालन गरिएको उनले बताए । ‘केही महिनाभित्रै जटिल प्रसूति र पाठेघरको शल्यक्रियासँगै ब्लड बैंक र भेन्टिलेटरसहितको आईसीयू सञ्चालन गर्ने योजना छ,’ उनले भने, ‘२५ लाख खर्चेर २४ औं घण्टा खुला रहने फार्मेसी सञ्चालनमा आइसकेको छ ।’

अस्पतालका मेडिकल सुपरिन्टेन्डेड जितेन्द्र यादवका अनुसार स्तरीय प्रयोगशाला, डिजिटल अल्ट्रसाउन्ड, साधारण एक्सरे, ईसीजी, ५ वटा मोनिट्रिङ मेसिनसहितको कक्ष व्यवस्था गरिएको छ । सर्पदंश र एन्टी रेबिज भ्याक्सिन, प्रसूति सेवा र अक्सिजनको व्यवस्था गरिएको छ ।

Leave a Reply

Your email address will not be published. Required fields are marked *